Almannavarnadeild ríkislögreglustjóra og embætti landlæknis héldu upplýsingafund fyrr í dag. Á fundinum var Þórólfur Guðnason, sóttvarnarlæknir, spurður út í hvort óhætt væri að halda veislur á næstunni, t.d. fermingarveislur.
Þórólfur sagði að ekkert samkomubann væri komið á, rétti tíminn væri ekki kominn til að setja slíkt bann á.
„Ég held að það sé ekkert að því,“ sagði Þórólfur spurður út í hvort fólk sem er að ferma börn ætti að reikna með að geta haldið fermingarveislur. Hann bætti þó við að hlutirnir breyttust hratt. „Þetta fer eftir áhættumati á hverjum degi. Það gæti gerst að það yrði ekki æskilegt [að halda veislur].“
Þórólfur sagði að verið sé að skoða hvernig samkomubann yrði framkvæmt hér á landi. Að reglur þyrftu þá að vera auðskiljanlegar og að tilmæli um fjölda og þéttleika yrðu að vera á hreinu.