Einn albesti handknattleiksmaður heims, Ómar Ingi Magnússon, leikur því miður ekki meira á heimsmeistaramótinu í handbolta vegna meiðsla.
Í gær á móti Svíum þurfti Ómar að fara af velli snemma í fyrri hálfleik vegna meiðslanna og nú er komið í ljós að hann verður ekki meira með á mótinu:
„Ómar Ingi er mjög líklega frá það sem eftir er á mótinu. Hann átti erfitt með að beita sér,“ sagði Guðmundur Þórður Guðmundsson landsliðsþjálfari við mbl.is eftir leikinn.
Eins og þetta sé ekki nóg þá er Aron Pálmarsson einnig meiddur – en vonandi kemur hann sterkur til baka í næsta leik:
„Við lendum líka í að Aron dettur út í hádeginu. Hann gat ekki verið með, sem var mikið áfall. Það þarf engan sérfræðing til að sjá hve stórt skarð er hoggið í okkar raðir þegar þessir tveir eru ekki til taks,“ sagði Guðmundur Þórður Guðmundsson landsliðsþjálfari.