Ummæli Bjarna Benediktssonar varðandi Landsspítalann þar sem hann kennir stjórnendum og starfsfólki hans um vandræðin vegna álagsins þar vegna Covid, frekar en fjárveitingum, sem hann segir meira en nægar, hafa vakið mikla athygli og víða mikla reiði.
Rætt er um málið víða á samfélagsmiðlum og á einum þeirra segir Sveinbjörn Hjörleifsson að „ég held að það liggi alveg ljóst fyrir að það á vísvitandi að láta heilbrigðiskerfið falla. Næsta skref eftir það verður að einkavæða heilbrigðisþjónustuna og selja hana á uppboði. Með þeim gjörning mun skapast tvöfalt kerfi þar eins og víðar; efnað fólk mun fá toppþjónustu en efnaminna fólk og sérstaklega fátækt fólk má deyja drottni sínum úti á götu. Þetta er allt samkvæmt kokkabók nýfrjálshyggjunnar,“ segir Sveinbjörn og bætir við:
„Ég skil ekki hvernig Sjálfstæðisflokkurinn getur kennt sig við íhaldssemi. Þeir hafa verið róttækasta aflið á Íslandi síðustu 30 árin.“
Hann segir að „samfélagsbreytingarnar sem þeir hafa keyrt í gegn eru ótrúlegar; við erum hægt og bítandi að komast á þann stað að það er ekkert til lengur sem heitir samfélag. Við erum öll villidýr í skóginum og eina reglan er sú að stærra og sterkara dýrið rífur það litla á hol.“
Bætir þessu við:
„Svo eru þau okkar sem dreymir um að byggja hér upp alvöru velferðarsamfélag með jöfnuð og réttlæti að fyrirmynd, kennd við öfgar og kommúnisma.“
Sigmundur Agnarsson tekur í sama streng og segir að í hans huga er „Bjarni Benediktsson fjármálaráðherra stórhættulegur heilbrigðisþjónustu þjóðarinnar.
Og Birna Einarsdóttir er heldur ekkert að skafa utan af hlutunum:
„Hvað veit þessi maður eiginlega um lífið? Heldur hann að veikindi sé eitthvað sem fòlk velur? Af hverju kemur hann sér ekki bara aftur ì sinn fílabeinsturn og þusar þaðan; nú þarf að hlusta à þá sem eitthvað vit hafa og hafa velferð almennings ì huga.“
Gyða Gunnarsdóttir tekur líka til „máls“ og spyr um ávísun þá sem Bjarni nefndi að ekki væri nein lausn fyrir heilbrigðiskerfið ef hann myndi skrifa hana út, heldur væri vandinn léleg stjórn spítalans sem hefði úr nægu fé að moða.
„Og stóri tékkinn? getur heilbrigðiskerfið ekki fengið kúlulán eins og Bjarni sjálfur fékk? Ég spyr af alvöru.
Jón Óli Vignisson segir einfaldlega:
„Djöfull er BB klikkaður.“
„Hann virðist lifa í Panama!“ segir Sverrir Daníel Halldórsson og Anna Elísabet Bjarnadóttir segir að þegar hún heyrði orð Bjarna um stjórn og starfsfólk Landspítalans „hélt ég að það myndu springa nokkrar æðar í hausnum á mér að hlusta á þessi fábjána svör hjá honum; að reyna að koma sökinni á Landspítalann hvernig ástandið er þar. Held að hann hafi nú alveg sjálfur og hans flokkur slatta til að svara fyrir – með fjársvelti á heilbrigðiskerfinu til fjölda ára. Svo að opna landið bara upp á gátt í heimsfaraldri. Þvílíkur fábjáni!“