Ljósmyndarinn Rúna Lind Kuru Kristjónsdóttir býr, ásamt eiginmanni sínum og þremur börnum, í Gisborne, sem er lítilll bær í norðausturhluta Nýja-Sjálands, sem fór mjög illa út út úr hitabeltisstorminum Gabrielle.
Rúna náði að senda fjölskyldunni sinni skilaboð í gærkvöldi með því að fara fyrir utan bæjarráðið í Gisborne og komast þannig í net- og símasamband.
Þar var fjöldi manns að reyna að hringja í ættingja sína og vini.
Segir Rúna að „vegirnir eru lokaðir inn og út úr bænum vegna mikilla skemmda; bensínstöðvum hefur verið lokað.“
Staðan er slæm hjá mörgum; sumir eru með mengað vatn í bænum, en húsið hennar Rúnu og fjölskyldunnar er með rigningartank, og það vatn er í lagi.
„Það er rosalegt ástand í landinu, og margir bæir eru enn algjörlega einangraðir. Það er einungis hægt að greiða fyrir mat og nauðsynjar með reiðufé, verslanir eru lokaðar og ekki er hægt að hringja í lögreglu eða á sjúkrabíl.“
Rúna og fjölskylda hennar eru með matarbirgðir en eðlilega er öllum brugðið yfir ástandinu eftir þennan skæða storm.