Eins og fram hefur komið mun Guðlaugur Þór Þórðarson tilkynna opinberlega – af eða á – um framboð sitt til formanns Sjálfstæðisflokksins á eftir, eða um klukkan 12:30 í Valhöll.
Margir bíða spenntir eftir ákvörðun Guðlaugs Þórs; framboð myndi hræra hressilega upp í tilveru Sjálfstæðismanna á Íslandi; verði ekki af framboði er ljóst að Bjarni Benediktsson mun sitja áfram, eins og hann hefur gert frá árinu 2009.
Ólafur Arnarson segir að möguleg áform Guðlaugs Þórs um framboð hafi valdið miklum titringi innan flokksins, sem gætu eyðilagt áform sem Ólafur vill meina að Bjarni sé með á prjónunum; fléttu sem sé í bígerð.
Sú flétta er á þennan veg:
„Bjarni er orðinn dauðþreyttur á stjórnmálavafstrinu og endalausum vonbrigðum með lélegt fylgi. Hann ætlaði hreinlega að draga sig í hlé á landsfundinum um næstu helgi og gera tillögu um að Áslaug Arna Sigurbjörnsdóttir tæki við formennsku í flokknum, fyrsta konan í sögunni. Ótrúlegt en satt! Metnaður Áslaugar er takmarkalaus en pólitískir hæfileikar hennar eru enn sem komið er takmarkaðir. Hugmyndin þykir því ekki bera vott um skarpa dómgreind Bjarna Benediktssonar heldur einkennast fremur af þreytu og löngun til að losna eftir langa og stranga vakt mikilla vonbrigða.“
Ólafur er klár á því að Bjarni sé á útleið fljótlega; hvort sem Guðlaugur Þór fer gegn honum eða ekki:
„Guðlaugur Þór ruglar þessi áform Bjarna heldur betur og því er hlaupin talsverð kergja í ýmsa viku fyrir landsfundinn. Hermt er að í utanríkisráðuneytinu bíði frátekið sendiherrastarf í Washington sem Geir Haarde gegndi á sínum tíma með sóma. Bjarni mun hafa mátað sig í það embætti.“