„Hann hefur verið fluttur á leynilegan stað og lögreglan heldur rannsókn sinni áfram,“ skrifar Daniel Taylor, blaðamaður The Athletic, um Gylfa Þór Sigurðsson. Tæpt ár er liðið frá því að Gylfi var handtekinn vegna gruns um brot gegn ólögráða einstaklingi. Samkvæmt heimildum Daniels er Gylfi nú búsettur í svokölluðu öryggishúsi en eru tíðindi væntanleg í máli Gylfa þann 16.júlí næstkomandi.
„Hann spilar ekki golf með liðsfélögunum, fær sér ekki kaffi á kaffihúsi með þeim,“ skrifar Daniel og bætir við að hann hafi vitneskju um það að fartölva fótboltamannsins hafi verið tekin af honum. Þá sé búið að teipa fyrir þakglugga hússins svo að ekki sé hægt að taka myndir. Enginn hjá Everton hefur viljað tjá sig um það hvort félagið hafi hjálpað til við að útvega Gylfa húsið. Gylfa hefur verið veitt lausn gegn tryggingu fimm sinnum frá því hann var handtekinn.
Fréttablaðið fjallaði fyrst íslenskra miðla um málið.