Sema Erla Serdar tjáir sig um dóminn yfir Margréti Friðriksdóttur sem gerður var heyrinkunnugur í dag; var Margrét, eins og Mannlíf greindi frá, dæmd í 30 daga skilorðsbundið fangelsi vegna hótana er hún viðhafði gegn Semu Erlu:
„Í ágúst árið 2018 fór ég til lögreglunnar til þess að kæra konu fyrir hótanir, líkamsárás og hatursglæp eftir að hún réðst á mig með svívirðingum, morðhótunum og líkamlegu afli fyrir utan veitingastað í Reykjavík. Nú, næstum hálfum áratug síðar(!), hefur konan verið sakfelld fyrir líflátshótanir og dæmd í 30 daga skilorðsbundið fangelsi!“
Hún bætir við:
„Það er vissulega margt í málsmeðferð yfirvalda sem er ábótavant og mikilvægt að ræða í þaula. Tíminn, augljóslega! Það er ólíðandi að ofbeldismál séu árum saman í kerfinu. Það er fóður fyrir frekara áreiti og ofbeldi þegar gerandi er ekki boðaður í skýrslutöku hjá lögreglu í næstum eitt og hálft ár. Að það gleymist að bjóða brotaþola að leggja fram bótakröfu (ekki í fyrsta skipti).“
Sema Erla bætir því við að dómskerfið hér á landi „þvingar þolendur til þess að mæta gerendum sínum í dómssal og sæta frekara áreiti. Vanþekking á hatursglæpum og hatursorðræðu og áhrifum þess innan lögreglunnar og réttarkerfisins, sem birtist meðal annars í því að skýrslutaka yfir geranda tók eina mínútu samkvæmt gögnum máls og ekki var litið til fyrri „samskipta“ sem einkenndust af áralangri hatursorðræðu, persónuníði og ærumeiðingum í minn garð þegar málið var fyrst látið falla niður (ég fór með bunka af útprentuðum ummælum þegar ég gaf skýrslu).“
Einnig að „skortur á skilgreiningu á hatursglæpum í almennum hegningarlögum, sem umrædd kona gerist vissulega sek um, en erfitt er að ákæra fyrir ef það er ekki til í lögum? Þetta og margt annað í tengslum við þetta mál þarf að ræða og það verður örugglega gert.“
Sema Erla segir að endingu að „akkúrat núna ætla ég þó bara að leyfa mér að ná andanum aðeins og fagna því að konan sem hefur áreitt mig frá árinu 2014 og beitti mig síðar líkamlegu og andlegu ofbeldi hafi LOKSINS verið látin sæta ábyrgð fyrir gjörðir sínar!
Þetta mál hefur tekið verulega mikið á og verið erfitt fyrir mig og mitt fólk. Réttlætið sigraði þó (að minnsta kosti að einhverju leyti) að lokum! Þetta er ekki bara sigur fyrir mig heldur er það líka sigur fyrir samfélagið þegar ofbeldisfólk er dæmt fyrir gjörðir sínar!“