Rússneski sendiherrann á Íslandi segir vesturveldin haldin andrússnesku eðli og fullyrðir að Úkraína sé verkfæri þeirra til að valda sem mestum skaða.
Sendiherra Rússlands á Íslandi, Mikhail Noskov, fullyrðir að Úkraína sé lítið annað en verkfæri í höndum Bandaríkjanna og Atlantshafsbandalagsins til að valda Rússlandi sem mestu tjóni, í aðsendri grein, er birtist í Morgunblaðinu undir yfirskriftinni „Um ástandið í kringum Úkraínu.“
„Nýlega gengust fyrrverandi þátttakendur í Minsk-ferlinu – Angela Merkel kanslari Þýskalands, Francois Hollande forseti Frakklands og Petro Poroshenko forseti Úkraínu – við því að yfirvöld í Kænugarði, Berlín og París ætluðu sér ekki að standa við samninga sem höfðu náðst í Minsk.“
Bætti þessu við:
„Innanlandsátök í Úkraínu voru fyrst og fremst afleiðing þjóðfjandsamlegrar stefnu öfgahægriafla sem tóku við stjórn í Kænugarði eftir að blóðugt valdarán var framið með virkri aðstoð Bandaríkjanna og leiðandi Evrópulanda árið 2014,“ skrifar Noskov.
Hann sakar stjórnvöld í Washington og London um að hafa þrýst á ráðamenn í Úkraínu að slíta friðarviðræðum við Rússa í apríl á síðasta ári.
Noskov ávítar Íslendinga fyrir að hjálpa Úkraínu, en fullyrðir samt að Úkraínumenn skipti vesturveldin litlu sem engu máli, og ítrekar að markmið þeirra sé ósigur Rússlands:
„Ísland þar á meðal, sem hefur ekki einu sinni á að skipa eigin her (við hæfi er að minna á þátttöku yfirvalda í Reykjavík í flutningi á vopnum og hergögnum til Úkraínu með innlendum fraktflugfélögum).“