Bæjarráð Ísafjarðarbæjar hefur ákveðið að hætta alfarið rekstri upplýsingamiðstöðvar á Þingeyri.
Þetta kom fyrst fram á vefnum bb.is.
Fyrrnefnd upplýsingamiðstöð hefur undanfarin ár verið rekin yfir sumartímann. Það er handverkshópurinn Koltra sem rekur verslun í húsinu og sér um miðstöðina; þar er starfsmaður alla daga vikunnar og leiðbeinir hann ferðamönnum sem koma til bæjarins.
Jónína Hrönn Símonardóttir er formaður handverkshópsins, og segir hún miður að sveitarfélagið muni ekki framlengja við þau samning, sem hljóðar upp á 750 þúsund krónur á ári:
„Gestir í sumar voru rúmlega 5.500, sem komu til okkar, og þeir skiptust þannig að það voru 3.600 erlendir og tæplega 2.000 innlendir. Þannig að það er þónokkur straumur af ferðamönnum sem kemur þarna í gegn,“ segir Jónína Hrönn.
Kemur fram að Ísafjarðarbær hafi rökstutt ákvörðunina með því að segja að upplýsingamiðstöðin væri barn síns tíma; netið og stafræn tækni hafi tekið við:
„Það sé eiginlega kannski ástæðan fyrir að eigi að leggja þetta niður af því það séu allar upplýsingar á netinu, þá er það bara ekki þannig. Því að við erum til dæmis hérna með mjög hættulegan veg sem við köllum fyrir nes. En vegurinn er mjög hættulegur og er bara alls ekki fyrir óvana að keyra, en með að hafa upplýsingamiðstöð á svæðinu. Með því að veita fólki upplýsingar um hvernig vegurinn er dag frá degi, því það uppfærist ekkert reglulega á netinu,“ segir Jónína Hrönn að endingu.