Kári Stefánsson sagði í umræðuþættinum Silfrinu að tilraunir með hugvíkkandi efni séu einhver sá allra mest spennandi möguleiki sem komið hafi fram í þróun lyfja við geðsjúkdómum í mjög langan tíma.
Kári segir að hingað til hafi lyf sem eigi að hafa áhrif á geðsjúkdóma oftast verið slævandi; nú sé verið að rannsaka hugvíkkandi efni á borð við sveppi, LSD, MDMA og Ayahuasca; hvort efnin geti haft jákvæð áhrif á geðsjúkdóma, svo sem þunglyndi, fíknir og þráhyggju:
„Svo erum við allt í einu komin með þessi efni sem hafa bein áhrif á innihald meðvitundar án þess að slæva fólk og í því felst mjög spennandi möguleiki. Þess ber hins vegar að geta að geta að það er enginn búinn að sanna að þessi efni hafi jákvæð áhrif á sjúkdóma,“ segir Kári sem telur engar líkur á því að Íslensk erfðagreining taki þátt í rannsóknum á hugvíkkandi efnum; nefnir að vegna þess hversu algengar meðferðir með þessum lyfjum séu að verða sé erfitt að gera alveg hefðbundnar rannsóknir á þeim og því megi velta upp hvort ástæða sé fyrir samfélagið að endurskoða það ferli:
„Mundi ég prófa þetta sjálfur? Sko menn segja þegar þeir taka svonalagað að það breytist dálítið afstaða manns til þess hvernig þeir nálgast verkefni og svo framvegis. Kannski þegar ég hætti í þeirri vinnu sem ég er í núna, eða við skulum ekki endilega segja kannski, ég er alveg 100% viss um að þegar ég hætti í þeirri vinnu sem ég er núna þá kem ég til með að taka svona lagað inn með morgunkaffinu á hverjum degi,“ sagði Kári Stefánsson.