Þórhildi Gyðu Arnardóttur var mjög brugðið eftir frétt sem DV birti á síðu sinni í gærkvöldi þar sem vitnað er í Facebook færslu Sigurðar G. Guðjónssonar. Hún sagðist í viðtali við Mannlíf hafa verið andvaka í nótt.
,,Ég ætla að leita til lögfræðings,’’ sagði Þórhildur Gyða nú í morgun og kvaðst ekki ætla að tjá sig efnislega um málið að svo stöddu.
Í lögregluskýrslunni sem Sigurður birti á Facebook síðu sinni og DV fjallar um kemur fram að Þórhildur hafi farið og fengið áverkavottorð eftir umrætt laugardagskvöld. Þar er Þórhildur að gefa skýsrlu vegna meintrar árásar Kolbeins Sigþórssonar fótboltakappa.
,, Fékkstu einhverja áverka,“ spyr lögreglukona Þórhildi.
„Enga sýnilega en ég fór svo upp á slysó á sunnudaginn og þá sagði hann að ég væri með óvenjulega miklar bólgur í hnakkaskýlinu eða svona punktarnir sem eru hérna sem gæti lýst því að það hafi þrengt að,“ sagði Þórhildur við lögregluna.
Var með áverka
Í viðtali sem Þórhildur átti við RÚV á dögunum segir hún að hún hafi hlotið áverka sem vörðu í 2-3 vikur.
,,Ég var með áverka í alveg 2-3 vikur eftir hann,’’ sagði Þórhildur í viðtalinu en talaði ekki um sýnilega áverka.
,,Ég á í raun ekkert persónulega við hann að sakast, samt sem áður var ég ekki að búast við því að hann yrði valinn aftur í landsliðið. Af því að KSÍ veit af ofbeldinu‘‘ sagði Þórhildur undir lok viðtalsins en ástæða þess sem hún steig fram með sína sögu var svar Guðna Bergssonar er hann var spurður hvort mál af þessu tagi hafi komið inn á borð til hans.