Flokkur fólksins mun leggja fram vantrausttillögu á hendur ríkisstjórnar Íslands í næstu viku, eins og fram kemur á mbl.is.
Inga Sæland, formaður Flokks fólksins segir að „það sem við stefnum á er að leggja fram vantraust á ríkisstjórnina sjálfa.“
Inga hefur komið að máli við alla stjórnarandstöðuflokkana varðandi fyrirhugaða tillögu; segir það skýrast eftir þingflokksfundi á mánudag hvaða flokkar munu styðja tillöguna.
„Enda eru þrír ráðherrar í þessari ríkisstjórn alveg einstaklega lagnir við það að fara ekki á eftir lögum í landinu,“ segir Inga og á þar við um Bjarna Benediktsson, forsætisráðherra, Svandísi Svavarsdóttur, sem fór nýverið frá matvælaráðuneytinu yfir í innviðaráðuneytið, og Guðmund Inga Guðbrandsson, félags- og vinnumarkaðsráðherra.
![](https://www.mannlif.is/wp-content/uploads/2022/08/Svan-1-1024x576.jpg)
Segir Inga að hún treysti ekki Bjarna Benediktssyni vegna vanhæfis hans í tengslum við sölu á hlut ríkisins í Íslandsbanka; treystir eigi Svandísi vegna ólögmæts hvalveiðibanns í fyrra, og þá treystir Inga ekki Guðmundi Inga vegna brostinna loforða um stofnun hagsmunafulltrúa fyrir eldri borgara:
![](https://www.mannlif.is/wp-content/uploads/2022/10/Gudmundur-Ingi-Gudbrandsson.jpg)
„Enginn stjórnarandstöðuþingmaður sem ég hef heyrt í treystir þessari ríkisstjórn,“ segir Inga sem kveðst aftur á móti ekki vera alveg viss um hvort flokkurinn geti einnig lagt fram vantrausttillögu á hendur Svandísi Svavarsdóttur innviðaráðherra „þar sem hún flúði á milli ráðuneyta.“