Framkvæmdir hafa um nokkurt skeið staðið yfir á skólalóð Vesturbæjarskóla. Verkið er langt komið og héldu margir að nú væri farið að sjá fyrir endann á framkvæmdunum, en þá stöðvaðist allt.
Íbúi Vesturbæjar spyr inni á Facebook hópi hverfisins hvað sé í gangi, hann hafi ekki séð neinn þarna við vinnu í nokkrar vikur.
„Það virðist vera svo lítið eftir, en samt sem áður er enginn að vinna við að klára verkið,“ skrifar íbúinn.
Hann segist einnig hafa séð krakka vera leika sér með rusl og efnivið verktakanna sem stendur við lóðina. Þar sem vantar upp á frágang er líka farið að losna og skemmast, skrifar hann. „Þetta lítur ekki vel út.“
Karen skrifar, „þetta er leikur hér í Reykjavík að skilja eftir ókláruð framkvæmdarsvæði og svo eigum við að giska hvað gerðist.“
„Til skammar hvernig vinnulagið er hérna, allt hálfklárað. Þarf ekki að hafa samband við borgina og fá þá til að klára þetta eða skólann?“ skrifar Katrín nokkur.
Steingrímur kallar þetta íslenska skipulagsógáfu á meðan Þórir nokkur segir svo lítið eftir að það taki sig ekki að klára þetta.