Formaður efnahags- og viðskiptanefndar Alþingis, Guðrún Hafsteinsdóttir, segir að mikil verðbólga séáhyggjuefni; mælist hún tæp 10 prósent.
Guðrún, sem tekur við sem dómsmálaráðherra af Jóni Gunnarssyni í mars, segir rétt að hafa huga í umræðunni að tekjustofnar ríkisins hafi dregist saman á sama tíma og verið sé að kalla eftir auknu fé í ýmis verkefni.
Guðrún segir það ljóst að Íslendingar séu að eyða of miklum peningum, en það sagði hún í samtali við Stöð 2:
„Hins vegar skulum við líka hafa það í huga að tekjustofnar ríkisins, þeir hafa rýrnað miðað við verðlag þannig að þeir hafa setið eftir. Þetta eru tekjustofnar sem standa undir rekstri ríkisins, útgjöldum ríkisins, sem að líka er kallað eftir auknu fé í, eins og í heilbrigðiskerfið, menntakerfið, samgöngukerfið og svo framvegis.“
Bætir við:
„Við erum sömuleiðis – eins sárt og það er að segja það – þá er fólk sömuleiðis að eyða of miklu. Það sjáum við á því að viðskiptajöfnuður okkar er neikvæður. Þannig að við erum að flytja meira inn heldur en út og þegar svoleiðis er þá tappast það af í gengi krónunnar eða í verðbólgu. Þannig að þetta er sameiginlegt verkefni okkar allra.“