Karlmaður nálgaðist matvöruverslun um klukkan eitt í nótt, vopnaður stærðarinnar eldhúshníf, og var lögreglu gert vart við. Þegar lögregla var á leiðinni á vettvang hafði maðurinn farið inn í verslunina. Þar ógnaði hann starfsmanni og krafðist þess að fá sígarettupakka en var maðurinn í mjög annarlegu ástandi. Skömmu síðar kom lögregla á vettvang og handtók manninn.
Fyrr um kvöldið var bifreið ekið á vegg í Kópavogi. Loftpúðar sprungu út við höggið og flúðu farþegar af vettvangi. Skömmu síðar kom ökumaðurinn til baka og útskýrði fyrir lögreglu að hann hafi orðið hræddur.
Tilkynning vegna líkamsárásar barst lögreglu um klukkan hálf ellefu í gærkvöldi. Karlmaður hafði samband við lögreglu og sagð frá því að tveir menn komu að bifreið hans á bílastæði, þar sem hann sat inni í bílnum. Þegar hann hafi svo stigið út úr bílnum hafi mennirnir látið höggin dynja á honum, sparkað í hann og veitt honum áverka. Maðurinn kvaðst ætla að leita sér aðstoðar á bráðadeild sjálfur en lögregla rannsakar málið.