Diljá Pétursdóttir stóð sig með prýði á dómararennslinu á Eurovision í gærkvöldi, þrátt fyrir tæknilega örðugleika á sviðinu. Fjölmargir áhorfendur voru á kvöldinu en þeir gerðu könnun sem var Diljá í vil.
Vilhelm Neto birti niðurstöður úr áhorfendakönnun dómararennslisins í gær en þar er Diljá í níunda sæti en alls komast tíu áfram á úrslitakvöldið sem haldið verður í Liverpool á laugardaginn.
„Audience poll eftir general prufu segir Ísland áfram! Nú kemur vonin…,“ skrifaði Vilhelm við myndina af úrslitum könnunarinnar. Sagðist hann ennfremur í athugasemd við færslu sína að hann hefði tekið eftir „mjög jákvæðri uppsveiflu á tiktok“.
Sigrún nokkur skrifar athugasemd við færsluna og segist hissa á fyrri spám. „Ég er bara án gríns hissa á hvað hún hefur verið neðarlega í öllum könnunum. Erum við heima bara galin og lagið er kannski bara alveg glatað? Fatta ekki neitt.“
Villi Neto svaraði um hæl: „Veit án djoks ekki hvað gerðist Sýnist á fólki þetta vera vegna uppsetningarinnar á sviðinu, og svo mjög yfirgnæfandi keppendur í umræðunni (Finland, Svíþjóð, Malta o.s.frv) Annars mjög furðulegt samt“.
Heiða nokkur kom með trúverðuga kenningu: „Gæti kannski verið af því við erum ekki með neitt myndband? Eina útgáfan er úr Söngvakeppninni og þar var sviðsetningin svona la-la. Vona að fólk sjarmerist upp úr skónum þegar það sér lokaútgáfuna af atriðinu.“