Í tilefni af 75 ára afmæli Davíðs Oddssonar, ritstjóra Morgunblaðsins, verður haldin heilmikil veisla á Edition-hóteli í miðborg Reykjavíkur í kvöld. Hótelið er það dýrasta á Íslandi og státar 5 stjörnum. Það stefnir því í milljónaveislu.
Gestalistinn
Reiknað er með að fjöldi boðsgesta mæti til að heiðra afmælisbarnið á þessum merku tímamótum í lífi þess. Einhverjir bíða þess spenntir að sjá hverjir eru enn í innsta hring Davíðs. Víst þykir að Vestmannaeyingar verði fjölmennir en Davíð starfar á Morgunblaðinu í skjóli aðaleigandans, Guðbjargar Matthísdóttur auðkonu. Þá er víst að Hannes Hólmsteinn Gissurarson prófessor og helsti stuðningsmaður Davíðs mæti. Hannes er einmitt með heilsíðugrein í Mogganum í dag þar sem hann mærir leiðtoga sinn. Ólíklegt þykir að annar aldavinur Davíðs, Jón Steinar Gunnlaugsson lögmaður, verði boðinn en Davíð móðgaðist og hætti að tala við hann fyrir nokkrum misserum. Þá má telja víst að Hreinn Loftsson, lögmaður og aðstoðarmaður Áslaugar Örnu Sigurbjörnsdóttur ráðherra án staðsetningar, hafi ekki fengið boðskort. Þá er nær öruggt að Jóhanna Sigurðardóttir, fyrrverandi forsætisráðherra, fær ekki að koma inn í hlýjuna. Reiknað er með að Katrín Jakobsdóttir forsætisráðherra og Guðni Th. Jóhannesson forseti mæti til að heiðar afmælisbarnið umdeilda.
Kveðjuveisla
Kvittur er uppi um að þetta verði kveðjuveisla fyrir ritstjórann aldna sem muni nú stíga til hliðar. Það kann þó að vera byggt á óskhyggju þeirra sem vilja sjá Davíð setjast í helgan stein.