- Auglýsing -
Ég hef við ýmis tækifæri hamrað á nauðsyn þess að opna safnaðarheimilin í fimbulkuldanum, þannig að þeir sem minna megi sín krókni ekki. Ég hef einnig gagnrýnt Agnesi biskup og fleiri harkalega fyrir aðgerðarleysi. Nú las ég í bændablaðinu grein um viðgerðir Skálholtskirkju, þar sem Kristján Björnsson vígslubiskup er skælbrosandi að segja að nú gangi allt þjóðkirkjunni í hag (Skálholt er hluti af þjóðkirkjunni), þegar ausið er hundraðamilljónum í viðgerð kirkjunnar, sem ætluð er að verða peningalind og mjólkurkú, vegna þess að það á að selja túristum aðgang að helgidómnum. Hallgrímskirkja er nú þegar orðin að dekurstað víxlaranna, svo kemur Skálholt og svo framvegis.
Þjóðkirkjan er endanlega að ganga af göflunum varðandi veraldarhyggju og flottræfilshátt. Ég legg til að framkvæmdir í Skálholti verði stöðvaðar og að kirkjan fari að sinna sínu „boðandi, biðjandi og þjónandi“ hlutverki.
Biskupar eru á ofurlaunum við að veraldarvæða þjóðkirkjuna, þetta endar með skelfingu.
Sr. Skírnir Garðarsson.