Tímarnir breytast og mennirnir með. Nú er rúmur áratugur liðinn frá því að síðast var byggt íbúðarhús á Þórshöfn; og nú vantar þar íbúðir.
Sveitarstjóri Langanesbyggðar, Björn S. Lárusson, segir í samtali við ruv.is að síðustu mánuði hafi margar fyrirspurnir borist frá fólki sem er að leita sér að íbúðarhúsnæði:
„Sérstaklega frá yngra fólki sem gjarnan vill fara úr fjölmenninu í borginni, eða höfuðborgarsvæðinu, út á land og vill setjast þar að.“
Björn segir dæmi um að fólk sé ýmist búið að fá vinnu, eða sé með tilboð um vinnu á Þórshöfn, og vanti eðlilega húsnæði.
Og þetta er allt að koma.
Björn nefnir að 10 til 12 lóðir séu nú tilbúnar til úthlutunar við þéttingu byggðar inni í grónum hverfum; í undirbúningi sé nýtt íbúðahverfi með allt að 24 lóðum sem eiga að verða tilbúnar til úthlutunar í vor:
„Þannig að við erum vel í stakk búin til að mæta þessari eftirspurn sem er. Þær umsóknir sem nú hafa borist eru til meðferðar hjá skipulagsnefnd og um leið og þær eru afgreiddar þá getur viðkomandi skilað inn teikningum til byggingafulltrúa og þá er hægt að fara að byrja.“