Hinn 11 ára Sauðkrækingur Grétar Freyr Pétursson hefur að gamni sínu tínt upp flugeldarusl eftir gamlársdagssprengingar í bænum.
Fram kemur í frétt Feykis um Grétar Frey, að hann telji að hann hafi safnað yfir 200 tertulíkum og farið með í Flokku.
Í samtali við Feyki segist Grétar hafa gaman af því að safna þessu saman og eyðir talsverðum tíma í þessa mjög svo þörfu vinnu. Reynir hann að fara um allan bæinn og dregur á eftir sér snjóþotu í neðri bænum en í efri hverfunum safnar hann ruslinu saman í hauga. Pabbi hans hjálpar honum svo að koma þeim heim á kerru og raðar upp. Áður en farið er með ruslið í endurvinnsluna tínir Grétar sjálfur upp á kerru.
Þrátt fyrir ungan aldur er Grétar ekki að gera þetta í fyrsta skipti en hann hefur gert þetta um árabil, án þess að margir taki eftir því hversu mikil vinnan fari í þetta að sögn svæðismiðilsins en hann var kominn á ról um hádegisbil á nýársdag en í heild tók verkið þrjá daga. „Það er fínt að þrífa bæinn og stundum þarf ég að róa mig aðeins niður og taka frí frá fjölskyldunni, losa mig aðeins í burtu,“ segir Grétar aðspurður um ástæðuna fyrir þessu góðverki hans. Það er mikið að gera hjá honum Grétari en hann er í sjötta bekk og æfir knattspyrnu, badminton og golf en einnig reynir hann að sinna hestamennsku á sumir eins og góðum Sauðkræklingi sæmir. Aukreitis stundar hann nám í tónlistarskóla þar sem hann lærir á píanó en svo er einnig töluverð vinna að vera í skóla.