Met var sett á Fáskrúðsfirði um helgina er færeyska uppsjávarveiðiskipið Gøtunes kom með 3.431 tonn af kolmunna. Aldrei áður hefur jafn miklu verið landað af tegundinni í einum farmi hér á landi.
Samkvæmt Austurfrétt kom Gøtunes til Fáskrúðsfjarðar á laugardag en lönduninni lauk um miðjan dag á sunnudag. Kemur fram í frétt Austurfréttar að í raun hafi 5.000 tonnum verið landað í einum rykk því Hoffell, skip Loðnuvinnslunnar landaði strax á eftir. Gøtunes hefur áður landað á Fáskrúðsfirði en skipið landaði loðnu þar eystra, í hrognatöku í vetur
Framkvæmdastjóri Loðnuvinnslunnar, Friðrik Mar Guðmundsson, segir fínan gang vera í kolmunaveiðum. Suður af Færeyjum séu skip frá ýmsum löndum við veiðar. Þá eru hafnir í Færeyjum ásetnar og sigla því skipin til að mynda til Noregs og Danmerkur til að landa á meðan önnur koma hingað með aflann.