„Þetta er fjölskyldurekinn veitingastaður; hverfisstaður úti á Kársnesi. Kósí, huggulegur staður þar sem fólk getur gert vel við sig í mat og drykk,“ segir Ólafur Helgi Kristjánsson matreiðslumeistari sem rekur veitingastaðinn ásamt eiginkonu sinni, Sólveigu J. Guðmundsdóttur. Óli sér um að kokka ásamt frábæru teymi sem hefur mikla ástríðu fyrir matargerð á meðan Sólveig er í salnum með sýnu teymi sem leggja mikið upp úr því að veita góða þjónustu svo kúnninn geti notið sín í mat og drykk.
„Við opnuðum staðinn í september 2021 en þetta var gamall draumur sem ég var búinn að gefa upp á bátinn. Ég var í mjög góðu starfi á Hótel Sögu sem yfirkokkur en svo fór Hótel Saga á hausinn vegna Covid og maður lenti aðeins á götunni. Ég fór að leita að stað, rými, þar sem ég gæti opnað veitingastað og fann þetta pláss sem mér leist mjög vel á. Það er og verður mikil uppbygging á Kársnesinu á næstu árum sem er spennandi að vera partur af.“
Ólafur Helgi segir að Brasseri Kársnes sé hverfisstaður. „Þetta er huggulegur veitingastaður fyrir fólkið í hverfinu til að njóta, það þarf ekki alltaf að fara niður í bæ.“ Hann bætir við að fastakúnnarnir séu margir sem skapar skemmtilegt og persónulegt andrúmsloft á staðnum.
Ástríða í matargerð
„Matseðillinn höfðar til allra og við breytum reglulega um rétti á seðlinum til að halda okkur kokkunum á tánum. Við leggjum mikið upp úr því að bjóða upp á ljúffengan og góðan mat og erum meðal annars með góðar steikur og fiskrétti. Svo erum við einnig með skemmtilegan og bragðgóðan brunch um helgar þar sem er til dæmis boðið er upp á amerískan, danskan og spænskan brunch. Drykkir eru einnig partur af góðri matarupplifun og höfum við komið upp góðum vínseðli ásamt kokteilum, bæði áfengum og óáfengum. Teymið á Brasserie Kársnes er skapandi og hugmyndaríkt með mikla ástríðu fyrir matargerð.“
Ólafur Helgi segir að það sem einkenni Brasserie Kársnes sé persónulega tengingin sem starfsfólkið hefur við kúnnann. „Við erum með frábært starfsfólk sem hefur hjálpað okkur að skapa einstaklega afslappað og þægilegt andrúmslofti þar sem gestirnir okkar geta notið sín vel í mat og drykk.“
