Alfreð Gíslason, landsliðsþjálfari Þýskalands í handbolta, telur að íslenska landsliðið geti komist langt á komandi heimsmeistaramóti; það megi þó ansi lítið út af bregða.
Ísland og Þýskaland léku tvo æfingarleiki í Þýskalandi um nýliðna helgi þar sem liðin skiptu með sér sigrunum í jöfnum og spennandi leikjum.
Alfreð segir í samtali við ruv.is að Ísland vel geta farið alla leið upp á verðlaunapall á mótinu:
„Ísland er með alveg frábærlega skemmtilegt sóknarlið að því leyti að þeir eru góðir maður á móti manni. Gísli Þorgeir var frábær báða leikina, sérstaklega í dag, stjórnaði þessu alveg frábærlega. Janus Daði líka að spila mjög vel og Viggó hinum megin þannig að það sýnir bara breiddina og í heildina voru þetta skemmtilegir og góðir leikir fyrir okkur og nú þurfum við bara leggjast aðeins yfir þá.“
Alfreð segir að væntingarnar séu alltaf miklar á Íslandi þegar kemur að handboltalandsliðinu:
„Ísland getur farið mjög langt. Ég sagði nú fyrir stuttu síðan að Ísland er með lið sem á að geta sótt verðlaun en það er náttúrlega þannig að eina eða tvö meiðsli geta skaðað hvaða lið mjög mikið,“ sagði Alfreð Gíslason.