Einn einstaklingur greindist með COVID-19 kórónaveiruna síðastliðinn sólarhring, en smitið greindist hjá Íslenskri erfðagreiningu. Fjöldi smita sem greinst hafa eru því orðin 1.790.
1.570 hafa náð bata og 18.738 hafa lokið sóttkví.
Fjórtán eru á sjúkrahúsi og fjórir á gjörgæslu vegna COVID-19, 731 einstaklingur er í sóttkví og 210 í einangrun. Tekin hafa verið 45.971 sýni og hafa 685 ný sýni bæst við frá því í gær.
Tíu af þeim sem hafa greinst með COVID-19 hafa látist.
Daglegur upplýsingafundur almannavarna- og landlæknis fer fram klukkan tvö þar sem farið verður yfir stöðu mála í sambandi við faraldurinn og farið yfir aðgerðir til að sporna við útbreiðslu kórónuveirunnar.
Gestur fundarins verður Unnur Sverrisdóttir, forstjóri Vinnumálastofnunar.