Dómur féll í dag í Héraðsdómi Reykjaness í máli Brynjars Joensen Creed sem ákærður var fyrir margvísleg kynferðisbrot gegn fimm stúlkum undir 15 ára aldri.
Samkvæmt upplýsingum frá héraðssaksóknara var Brynjar sakfelldur fyrir suma ákæruliði en sýknaður í öðrum. Ákæruliðir voru samtals 17.
Brynjar var dæmdur í sex ára fangelsi
Hann var jafnframt úrskurðaður í mánaðarlangt gæsluvarðhald en rannsókn stendur yfir á fjölmörgum meintum kynferðisbrotum hans. Ætluð brot Brynjars eru gífurlega umfangsmikil og sagði héraðssaksóknari að: „þetta væri eitt umfangsmesta kynferðisbrotamál sögunnar.“
Var handtekinn á vinnustað sínum
Elsta brot Brynjars er frá árinu 2018 en flest brotin voru framin á síðasta ári. Brynjar var handtekinn á vinnustað sínum, stóru heildsölufyrirtæki, þann 8. nóvember, og hefur síðan þá setið í gæsluvarðhaldi í fangelsinu á Hólmsheiði. Hjá fyrirtækinu starfaði Brynjar við viðhald tækja og þjónustu við fyrirtæki, stofnanir og skóla. Lögreglan lagði hald á vinnubíl hans og var meðal annars notast við upplýsingar úr ökurita við rannsókn málsins.
„Hann var hæglátur, pínu undarlegur. Utan við sig og erfitt að átta sig á honum. Lágmæltur,“ segir vinnufélagi Brynjars hjá fyrirtækinu, sem ræddi við DV á dögunum.
„Brynjar var augljóslega undir einhvers konar álagi. Hann klessti vinnubíl illa og var stundum að bakka á eða keyra utan í. Eins og hann væri ekki með hugann við umhverfið. Núna veit maður hvað hann var að hugsa um. Ógeðslegt,“ segir vinnufélaginn ennfremur.
Þess má geta að Brynjar var trúnaðarmaður fyrir sinn vinnustað hjá VR. Hann hefur tekið þátt í almenningshlaupum og hlaupið til styrktar góðum málefnum.
Sem fyrr segir bíða Brynjars fleiri ákærur þar sem meint brot hans af sama tagi og hann var sakfelldur fyrir í dag eru í rannsókn hjá Lögreglunni á Suðurnesjum.
Dómurinn hefur ekki verið birtur og óljóst hvenær það verður
Maðurinn var ákærður fyrir fjölda grófra kynferðisbrota gegn fimm ungum stúlkum. Þær voru allar á grunnskólaaldri þegar maðurinn var sagður hafa brotið gegn þeim.
Elsta málið er nærri fjögurra ára gamalt en flest brotin voru síðan í fyrra. Stúlkurnar fimm kröfðu manninn um samtals 17,5 milljónir í miskabætur.
Í ákærunni var maðurinn meðal annars ákærður fyrir kynferðislega áreitni gegn barni, kynferðisbrot gegn barni og nauðgun auk fleiri vægari brota. Í ákærunni voru sumar stúlkurnar sagðar hafa sent honum kynferðislegt myndefni. Maðurinn var einnig sagður hafa sent þeim slíkt myndefni á samskiptaforritinu Snapchat.
Grunur að hann hafi níðst á fleiri börnum
Ákæran var á sex blaðsíðum sem er sjaldgæft í kynferðisbrotamálum og ákæruliðirnir 17.
Hann var sagður hafa sent einni stúlkunni kynlífshjálpartæki, undirföt, nikótínpúða, rafrettur, áfyllingar í rafrettur og áfengi gegn því að hún sendi honum myndefni gegnum samskiptaforritið Snapchat.
Fram kom í fréttum RÚV í síðustu viku að maðurinn væri til rannsóknar hjá lögreglunni á Suðurnesjum vegna gruns um að hafa níðst á fleiri börnum.
Fram kom í fréttinni að málið væri raunar svo umfangsmikið að fjölga þurfti stöðugildum í Barnahúsi. Ólöf Ásta Farestveit, forstjóri Barna- og fjölskyldustofu, staðfestir það. Mikið álag hafi verið í Barnahúsi í heimsfaraldrinum og að heimild hafi fengist til að ráða í eitt og hálft stöðugildi, meðal annars vegna þessa máls.