Knattspyrnuþjálfarinn Óskar Hrafn Þorvaldsson hefur sagt upp störfum hjá norska liðinu Haugesund en Óskar skrifaði undir þriggja ára samning við félagið í október. Tíðindin koma mikið á óvart en ekki hefur verið gefin upp nein ástæða þess að hann hætti.
Haugesund er í norsku úrvalsdeildinni og liðið hefur leikið sex leiki á tímabilinu í deildinni og er með sex stig eftir þá leiki.
„Við höfðum hlakkað til að eiga langt og gott samstarf við Óskar en hlutirnir enda ekki alltaf eins og maður hugsar. Við þökkum honum fyrir þá vinnu sem hann hefur lagt í að þróa FK Haugesund áfram,“ sagði Christoffer Falkeid, stjórnarformaður Haugesund um uppsögn Óskars.
„Við hefjum núna það ferli að finna eftirmann hans. Stefna okkar og stefna félagsins verður áfram sú sama.“