Samkvæmt heimildum Mannlífs er Silja Björk rithöfundur, femínisti og stofnandi hlaðvarpsins Kona er nefnd, líklega sú sem á von á sjötta kröfubréfinu sem sent hefur verið út, til viðbótar við þau fimm sem áður hafa verið send. Það voru þessir aðilar sem fengu bréfin fimm: Edda Falak, fjármálafræðingur, Crossfit þjálfari, Þáttastjórnandi, Stofnandi og Eigandi hlaðvarpsins Eigin Konur, Erla Dóra Magnúsdóttir, blaðamaður, Ólöf Tara Harðardóttir, einkaþjálfari, næringarráðgjafi og meðlimur aðgerðahópsins Öfga, Sindri Þór Hilmars- og Sigríðarson markaðsstjóri og Kristlín Dís Ingilínardóttir, blaðamaður.
Silja Björk tísti þessu þegar fyrri kröfubréf höfðu verið send út og er talið að þetta séu þau ummæli sem sjötta kröfubréfið snúist um: „Ókei mér finnst geggjað að Halli bjóðist til að aðstoða þessa kvenskörunga fjárhagslega en….erum við samt ekki ÖLL sammála því að við erum ekki að fara að moka peningum í barnaníðing og nauðgara???“.
Fréttablaðið greinir frá því að Silja Björk sé enn ekki búin að fá bréf frá lögfræðingi Ingólfs Þórarinssonar, Ingó veðurguðs. „ Silja hafði þetta um málið að segja þegar blaðið hafði samband við hana: „Þetta er sett fram á mjög hlutlausan hátt og enginn er nefndur á nafn nema Halli. Þetta er almennt yfirlýsing um ástandið í þjóðfélaginu og í dómskerfinu frekar en eitthvað annað. Ef einhver aðili hefur tekið þetta til sín persónulega þá verður sá sami að eiga það við sjálfan sig“.
Þá kemur einnig fram að Vilhjálmur Vilhjálmsson lögmaður Ingólfs hafi sagt að einungis væru send út kröfubréf í tengslum við alvarlegustu ásakanirnar á hendur hans skjólstæðings. „Það að hópur fólks hafi ákveðið að beita fyrir sig slagkrafti samfélagsmiðla og ráðast á umbjóðanda minn með nafnlausum ósönnum ásökunum um alvarleg kynferðisbrot gegn börnum og nauðganir, er ekki bara gróf aðför að friðhelgi einkalífs og æru umbjóðanda míns, heldur líka réttarríkinu. Því ef þessi aðferð er samþykkt getur hver sem er fyrirhafnarlaust rústað mannorði hvers sem er í skjóli nafnleyndar“.
Nú er bara að bíða og sjá hvort Silju Björk eigi eftir að berast kröfubréf eður ei.