Almannavarnadeild ríkislögreglustjóra boðar til reglulegs blaðamannafundar klukkan 14 í dag í Skógarhlíð 14.
Víðir Reynisson yfirlögregluþjónn og Alma D. Möller landlæknir munu fara yfir stöðu mála með tilliti til COVID-19, staðfestra smita hér á landi, aðgerða stjórnvalda og fleira.
Alls eru 138 smit staðfest hér á landi og rúmlega þúsund manns í sóttkví.
Á fundinum verður sérstaklega fjallað um eldri borgara en það er einkar mikilvægur hópur í þeim aðgerðum sem miða að því að hefta útbreiðslu á áhrif veirunnar hér á landi, að því er segir í tilkynningu. Þórunn Sveinbjörnsdóttir, formaður Landssambands eldri borgara, ræðir málefni þessa hóps.
Stefán Eiríksson, útvarpsstjóri, verður á fundinum en hann mun ræða þau verkefni sem Ríkisútvarpið vinnur að en stofnunin sinnir mikilvægu hlutverki í því almannavarnaástandi sem nú er.