Að bæta við, stækka eða breyta byggingarhlutum getur blásið nýju lífi í eldri byggingar. Það skiptir þó miklu máli hvernig það er gert og mikilvægt er að taka tillit til aldurs og tíðaranda byggingarinnar sem um ræðir.
Í bókinni Upgrade er skoðað hvernig arkitektúr og heildstæðar hönnunarlausnir geta gefið umhverfi okkar nýjan tilgang, allt frá smávægilegum breytingum til endurgerðar byggingahluta eða bygginga í heild sinni. Möguleikarnir eru því margir og niðurstöður verkefnanna í bókinni mismunandi og má þar sem dæmi nefna stækkun húss þar sem heilli hæð var bætt ofan á og gamalli verksmiðju breytt var í notalegt afdrep. Í sumum verkefnanna er burðarvirki sem áður var ósýnilegt gert sýnilegt og nýtt til þess að gefa rýminu meiri karakter.
Einnig er að finna í bókinni nýstárlegar leiðir til þess að nýta rými sem áður hafa verið illa nýtt eða jafnvel ónýtt og geta þær verið góður upphafspunktur þegar gera á upp eldri hús eða breyta þeim.
Það sem hafa þarf þó í huga þegar eldri byggingar eru annars vegar er að varhugavert getur verið að færa rými um stað, líkt og votrými. Það er því best að kalla til arkitekt eða byggingaverkfræðinga þegar slíkar framkvæmdir eru fyrirhugaðar.
Í bókinni deila ýmsir arkitektar reynslu sinni og nálgun á ólík verkefni og gefa auk þess góð ráð. Upgrade er tilvalin fyrir alla þá sem haf áhuga á arkitektúr og vilja finna spennandi leiðir til þess að varðveita byggingararfinn. Það sem sumum virðist ónýtt er uppspretta nýrra tækifæra fyrir aðra.
