Frekar vandræðalegt atvik átti sér stað á körfuknattleik Los Angeles Lakers og Memphis Grizzlies í úrslitakeppni NBA. Þegar „kossakameran“ beindist að Harrý prins og Meghan, hallaði prinsinn sér að frúnni en hún hló bara.
Daily Mail segir frá því að þau Meghan og Harrý hafi verið á Lakers-leiknum ásamt fleiri stjörnum. Má þar helst nefna Kim Kardashian, Adam Sandler og Sean Diddy Combs, áður þekktur sem Puff Daddy. Þegar myndavélin beindist loks að Meghan og Harrý, neitaði Meghan að kyssa manninn sinn, fyrir framan 20.000 áhorfendur.
Þetta er í fyrsta sinn í mánuð sem þau sjást opinberlega saman en þau voru ansi brosmild að sjá af myndum og myndskeiðum að dæma. Þegar myndavélin beindist að þeim byrjuðu þúsundir áhorfenda að klappa og hvetja þau til að kyssast. Harrý virtist til í slaginn og hallaði sér að frúnni en hún hló og greip í öxl hans, í stað þess að verða við óskum áhorfenda. Harrý setti þá upp fýlusvip í gríni.
Þrátt fyrir þetta naut parið nærveru hvors annars á leiknum og knúsuðust mikið.
Hér fyrir neðan má sjá augnablikið vandræðalega.