Innan Sjálfstæðisflokksins gætir vaxandi spennu vegna forystumála flokksins. Flokkurinn glímir við fylgishrun og er með minna fylgi en elstu menn muna. Því er nánast slegið föstu að Bjarni Benediktsson formaður sé á förum af formannsstóli og vilji hans standi til þess að Þórdís Kolbrún Reykfjörð Gylfadóttir varaformaður taki við flokknum. Það gæti gerst snögglega og án kosninga ef Bjarni tekur þann kost að víkja án þess að til landsfundar komi og varaformaðurinn tæki við. Landsfundur, ári síðar, tæki svo ákvörðun um nýjan formann.
Vandinn er sá að vaxandi efasemdir eru uppi um stjórnvisku Kolbrúnar og þar sérstaklega vísað til þeirrar aðgerðar hennar að loka rússneska sendiráðinu. Þá hefur Áslaug Arna Sigurbjörnsdóttir metnað og dug til þess að verða formaður. Þessu til viðbótar er Guðlaugur Þór Þórðarson klár í slaginn með þann styrk að 40 prósent landsfundargesta studdu hann í hólmgöngunni við sitjandi formann. Hann mun græða á því ef Áslaug og Kolbrún bjóða sig fram báðar. Bjarni má ekki til þess hugsa að Guðlaugur verði kosinn formaður og gæti þess vegna reynt að þrauka áfram á formannstóli …