Fasteignasali vikunnar.
Fasteignasali vikunnar er Guðmundur Th. Jónsson, framkvæmdastjóri og annar af eigendum Fasteignamarkaðarins ehf. Hann á eina dásamlega dóttur, Klöru Rut, sem er fædd árið 2005 og býr í einbýli í hæðahverfinu í Garðabæ og hefur gert síðastliðin 9 ár.
Hvað heillar þig mest við starfið? „Það er mjög margt en líklega eru það fyrst og fremst lífleg samskipti við fólk og að upplifa ánægju viðskiptavina að farsælum fasteignaviðskiptum afstöðnum. Eins finnst mér frábært að koma til vinnu á hverjum degi og hitta fyrir það frábæra samstarfsfólk sem ég er svo lánsamur njóta samvista með.“
Getur þú lýst hefðbundnum vinnudegi hjá þér? „Dagurinn byrjar í World Class kl. 6.45 og ég mæti oftast til vinnu um kl. 8.30. Við fasteignasalar búum við þau forréttindi að dagarnir eru mjög fjölbreyttir. Þeir fela til dæmis í sér að eiga samskipti við kaupendur og seljendur, ýmist vegna tilboðsgerðar, skoðana á eignum, með tilliti til sölu og verðmats, bæði fyrir einstaklinga og fyrirtæki. Einnig eru fundarhöld algeng vegna ráðgjafar til fyrirtækja og einstaklinga. Svo fer drjúgur tími í umsjón og rekstur fasteignasölunnar, sem er á minni könnu, en sá hluti verður að sjálfsögðu að vera í góðu lagi. Vinnutími fasteignasala er ekki hefðbundinn því það eru stöðug símtöl í farsíma, tölvupóstar og að skoða eignir. Ég skal alveg viðurkenna að starfið getur stundum verið mjög krefjandi þegar áreitið er mikið á öllum tímum sólarhrings þegar maður hefur jafnvel gert áform um að verja tímanum í annað.“
„Það þarf stöðugt að endurnýja á heimilinu, hluti sem ganga sér til húðar, og akkúrat núna er ég að pæla í nýju hangandi loftljósi í eldhúsið og Arco-gólflampa í stofuna.“
Hvað finnst þér gera heimili að heimili? „Að það sé opið vinum og fjölskyldu. Eins skiptir mig máli að hafa ekki of marga hluti í kringum mig þannig að heimilið sé yfirhlaðið. Verð svo eiginlega að taka fram að ég er með hreingerningaráráttu og hef það fyrir reglu að hreingera heimilið að minnsta kosti einu sinni í viku. Mér finnst best að sjá um það sjálfur einhverra hluta vegna.“
Getur líst þínum stíl? „Einfalt er gott. Vandaðir hlutir og færri.“
Áttu þinn uppáhaldsarkitekt? ,,Þeir eru margir, meðal annars Sigvaldi Thordarson og Högna Sigurðardóttir, sem hafa teiknað mörg að fallegustu húsum landsins. Orri Árnason hjá Zeppelin-arkitektum finnst mér vera frábær og með sinn eigin einstaka stíl. Eins held ég mikið upp á Baldur Svavarsson hjá Úti – Inni arkitektum, en hann teiknaði einmitt húsið sem ég bý í og mér finnst hönnunin á því vera einstaklega vel heppnuð.“
Áttu þinn uppáhaldshönnuð? „Mér hefur þótt mjög gaman að fylgjast með velgengni íslenskra hönnuða á alþjóðlegum vettvangi og má þar til dæmis nefna Siggu Heimis, sem hefur náð mjög langt í sínu fagi og er að gera mjög skemmtilega hluti.“
Hvað hefur þig alltaf dreymt um að eignast en ekki eignast hingað til? „Ég hef verið að reyna að temja mér að vera frekar ánægður með það sem ég hef heldur en að hugsa stöðugt um eitthvað sem mig kynni mögulega að vanta. Eina sem mér kemur í huga er að ég myndi vilja öðlast meiri innri frið, en er að vinna í því líka.“
Er einhver hlutur sem þig langar að eignast í húsið þitt? „Það þarf stöðugt að endurnýja á heimilinu, hluti sem ganga sér til húðar, og akkúrat núna er ég að pæla í nýju hangandi loftljósi í eldhúsið og Arco-gólflampa í stofuna.“
Uppáhaldsliturinn þinn? „Enginn sérstakur, en mismunandi hlutir bera liti á mismunandi hátt þannig að uppáhaldsliturinn veltur svolítið á því um hvaða hlut ræðir. Í náttúrunni eru uppáhaldslitirnir mínir þeir sem árstíðirnar skapa hverju sinni og ótrúlegur fjölbreytileiki í þeim.“
Hvar líður þér best? „Mér líður best í stangveiði með veiðifélögum mínum og bestu vinum, Níelsi, Gísla og Hilmi, hvar sem við erum staddir hverju sinni. Laxveiðin er mitt uppáhaldsáhugamál en væri lítið varið í hana ef félagsskapurinn væri ekki góður. Hef reynt að fá Patrek Jóhannesson, einn af mínum bestu vinum, til að veiða með mér í nokkur ár, án árangurs, en ætli ég geri ekki enn eina tilraun með það í sumar.“
Er eitthvað sem þig langar að eignast í garðinn? „Þarf að endurnýja gasgrillið því það er orðið 15 ára gamalt. Ætla svo að lofa því hér á opinberum vettvangi að bjóða vinum mínum í grillveislu í garðinum í sumar svo að ég verði líklega að standa við það.“
Áttu þér uppáhaldshverfi á höfuðborgarasvæðinu? „Fyrir mér er Garðabærinn alltaf í uppáhaldi enda er ég alinn upp þar og ber því taugar til þess bæjarfélags. Þar liggja ræturnar og þar eignaðist maður sína æskuvini. Minningarnar eru margar og góðar og ég er ánægður með að búa í Garðabæ í dag, sem er að mínu mati afburðavel rekið sveitarfélag og öll þjónusta við íbúa eins góð og á verður kosið. Ég er þó viss um að sitt sýnist hverjum í þessum efnum, en jafnframt að mjög mörgum verður hugsað til æskustöðvanna þegar þeir fá svona spurningu.“
Er einhver byggingarstíll sem heillar þig meira en annar? „Nei, ég er mjög opinn fyrir byggingarstílum en reyni að sjá eitthvað óhefðbundið og skemmtilegt í hverjum og einum. Fór fyrir nokkrum árum um landið með góðum vini og skoðaði stafkirkjurnar, m.a. við Víðihlíð, Hofsós og í Eyjafirði og verð að segja að það er magnaður byggingarstíll, sem ég held að sem flestir ættu að gefa sér tíma til að skoða ef þeir eru á ferðalagi um landið. Nú svo er Stafkirkja í Vestmannaeyjum og ein á Árbæjarsafninu fyrir þá sem ætla ekki út fyrir borgarmörkin.“
Svalasti veitingastaðurinn á Íslandi í dag? „Það er ótrúleg gróska í veitingastaðamenningunni á Íslandi og frábært að sjá hvað það hefur orðið mikil bylting í þeim efnum á síðastliðnum tíu árum eða svo. Mínir uppáhaldsstaðir eru Sushi Social, Rok, Lof, Rossopomodoro og svo staðurinn þar sem ég borða oftast og býður upp á ótrúlega fjölbreyttan og hollan mat, en það er Nat Kitchen á Laugavegi 85.“
Að lifa lífinu lifandi er að … verja eins miklum tíma og hægt er með þeim sem þér þykir mest vænt um og skipta þig mestu máli. Ég má alveg gera betur í því og það er eitt af markmiðunum í lífinu að gera það.
Mynd / Aldís Pálsdóttir