Kristín Einarsdóttir hefur starfað sem fasteignasali í fimm ár en við sölu- og stjórnunarstörf í yfir 30 ár. Henni finnst starfið afar skemmtilegt þar sem mannleg samskipti vega þyngst.
„Það er áskorun að þjónusta fjölbreytta flóru viðskiptamanna með mismunandi þarfir og langanir,“ segir Kristín en mikilvægast sé að hafa hugfast að í flestum tilfellum sé verið að meðhöndla stærstu eigur fólks og því skipti miklu máli að fasteignasalar vandi sig í hvívetna.
„Á Domusnova starfar breiður hópur af konum og körlum. Kvennahópurinn samanstendur af tíu hörkuduglegum fasteignasölum með ríka þjónustulund og mórallinn á vinnustaðnum er einstaklega góður og samvinnan eins og best verður á kosið.“
Fasteignasalar verði fasteignamiðlarar
Kristín hefur ákveðnar skoðanir á fyrirkomulaginu þegar kemur að tilboðsgerð. „Í fyrsta lagi finnst mér réttara að kalla fasteignasala, fasteignamiðlara en í því orðalagi felst að ég er fulltrúi bæði kaupenda og seljenda, eins og lög gera ráð fyrir. Er þannig að vinna að hagsmunum beggja aðila meðan orðið fasteignasali gefur til kynna að ég tryggi aðeins hagsmuni seljenda.
Í öðru lagi vil ég taka upp vinnubrögð sem eru stunduð víðs vegar um heim, þar á meðal á Norðurlöndunum, að tilboðsgerðin sé fyrir opnum tjöldum – að tilboðin séu öllum opin meðan þau eru virk og aðrir tilboðsgjafar geti tekið ákvörðun hvort þeir vilji taka þátt í að bjóða betur eða ganga frá borði. Oft á tíðum virkar það þannig á kaupendur að fasteignasalinn sé að teygja verðið óhóflega upp og um leið myndast tortryggni á milli tilboðsgjafa og fasteignasala sem væri svo auðveldlega hægt að koma í veg fyrir,“ segir Kristín. „Í þriðja lagi er stóri draumurinn minn að í framtíðinni verði fasteignamiðlarinn annaðhvort fulltrúi seljenda eða kaupenda.“
Domusnova er með skrifstofur í Kópavogi, á Selfossi og Akranesi og er með fjölda eigna um land allt á skrá. Nánari upplýsingar eru á heimasíðunni domusnova.is.
Stúdíó Birtíngur í samstarfi við Domusnova