Prófar eitthvað nýtt á hverjum degi

Efnisorð

Deila

- Auglýsing -

Sólveig Pálsdóttir, rithöfundur, segist ekki strengja áramótaheit í eiginlegri merkingu, en hún passi betur upp á hollustuna í janúar en ella auk þess sem hún hafi í mörg ár fylgt gömlu heiti um það að prófa eitthvað nýtt á hverjum degi. En ætlar hún að strengja áramótaheit í ár?

„Já, svei mér þá, ætli ég geri það ekki bara,“ segir Sólveig spennt. „ Áramótaheitið mitt er hreint ekkert stórbrotið eða skáldlegt heldur felst það í því að halda áfram að gera æfingarútínuna mína að minnsta kosti fimm sinnum í viku og ganga fimm til sjö kílómetra, helst daglega. Ég byrjaði á þessu í fyrstu Covidbylgjunni þegar öllum líkamsræktarstöðvum var lokað og fyrir utan peningasparnaðinn þá svínvirkar þetta, bæði fyrir líkama og sál. Svo er það auðvitað að umgangast skemmtilegt og gefandi fólk.“

Ertu vön að strengja áramótaheit?

„Nei, ég get varla sagt það en er kannski með eitthvað í bakþankanum því janúar einkennist alltaf af hollari mat og litlu víni eftir lystisemdir desembermánaðar,“ segir Sólveig. „Reyndar hef ég eina reglu sem mætti kannski kalla áramótaheit og það er að læra eitthvað nýtt á hverju einasta ári. Oftast hefur það verið eitthvað bóklegt en nú er ég að hugsa um að læra eitthvað allt annað til dæmis myndlist, leirkeragerð eða smíði. Já, og svo ákveð ég alltaf að vera öguð í vinnu eftir áramót en rithöfundastarfið krefst sjálfsaga, ekki síst fyrir félagslynda manneskju eins og mig. Fyrir svona tuttugu árum  strengdi ég þess heit að gera tíu nýja hluti á hverjum einasta degi og við það stóð ég í mörg ár. Reyndar er þetta orðið svo inngróið í mig að ég hugsa að ég prófi ennþá eitthvað nýtt á hverjum degi. Þetta nýja þarf ekki að vera flókið heldur bara eitthvað eins og til dæmis að labba eða keyra nýja leið heim, hlusta á tónlist sem þú hefur ekki heyrt áður, rabba við einhvern sem þú hefur aldrei talað við áður, prófa nýja uppskrift, lesa um eitthvað sem þú þekkir ekki, greiða þér öðruvísi og svo framvegis. Ég hef tröllatrú á þessari aðferð til að halda huganum virkum og skapandi.“

Hvaða aðferð gefst best til að standa við heitin samkvæmt þinni reynslu?

„Þá sjaldan sem ég hef strengt heit þá finnst mér virka best að skrifa þau niður. Þannig breytast óljósar hugmyndir í skýr markmið,“ fullyrðir Sólveig.

Deila

Athugasemdir

Athugasemdir eru á ábyrgð þeirra sem þær skrá. Mannlíf áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.
 
- Auglýsing -

Orðrómur

Helgarviðtalið

Lestu meira

Nýtt í dag

Í fréttum er þetta helst...

Mest lesið í vikunni

- Auglýsing -