Heilbrigðisyfirvöld á vinsæla ferðamannastaðnum Tenerife á Spáni hafa staðfest eitt tilfelli Covid19 veirusmits þar. Smitaði einstaklingurinn er ítalskur læknir frá Norður-Ítalíu.
Fjölmargir Íslendingar eru staddir á Tenerife, þar af eru sjö sagðir í sóttkví á H10 Costa Adeje Palace hótelinu þar sem ítalski maðurinn dvaldi áður en hann val lagður inn á spítala.
Sigríður Elín Ásmundsdóttir er föst á Tenerife og veit ekki hvenær hún kemst heim. Þegar Mannlíf ræddi við hana í morgun var hún og hópurinn sem hún er með á Tenerife á leiðinni í apótek að kaupa handspritt vegna frétta um veirusmit á eyjunni. Sigríður segir að núna hafi raðir myndast fyrir utan apótek á Tenerife þar sem fólk kaupir andlitsgrímur og spritt.
Rögnvaldur Ólafsson, lögreglufulltrúi hjá almannavarnardeild ríkislögreglustjó, sagði í samtali við mbl.is að mögulega þurfi Íslendingar sem eru á leið heim frá Tenerife á næstu dögum að fara í 14 daga sóttkví við heimkomu.
Þórólfur Guðnason sóttvarnarlæknir hefur þá bent á að fólk geti verið með veiruna án þess að finna fyrir einkennum sem gerir það að verkum að erfitt er að ráða við útbreiðslu.