Íslenska kvikmyndafyrirtækið Sagafilm birtir á Facebook minningu um Einar Jósefsson. Hann starfaði hjá fyrirtækinu um árabil en lést langt fyrir aldur fram. Jarðaför Einars fer fram síðar í dag.
„Það var okkur samstarfsfólki Einars í Sagafilm mikið áfall þegar við fréttum af óvæntu andláti hans. Hann var búinn að vera með Sagafilm í hartnær 10 ár og hafði á sinn einstaka hátt haldið uppi tölvukerfunum okkar, sem voru bútasaumuð eftir tíðarandanum en virkuðu þó vel fyrir það sem við vorum að gera,“ segir í færslu Sagafilm.
Einar hafði einlægan áhuga á öllum tæknigræjum. „Einar IT var einstaklega flínkur tæknimaður og leysti oft með sposkum svip lítil sem stór tölvumál sem við starfsfólkið glímdum við. Hann vann verkin sín í hæfilegri fjarlægð frá hlátrasköllum kaffistofunnar og undi sér best inni á sínum kontor þar sem kynslóðum af tölvum, spilurum, hörðum diskum, snúrum og tæknigræjum ægði saman. Tækjaáhugann mátti líka merkja í faraskjótum þeim sem Einar notaði til að koma í vinnuna, því þegar hann hætti að koma á bíl, var það mótorhjól, rafhjól, rafskutla, reiðhjól eða tveir jafnfljótir sem komu honum hingað til okkar,“ segir í færslu Sagafilm
Fyrirtækið sendir samúðarkveðjur til fjölskyldu hans. „Ekki fór fram hjá neinum hvað Einar var stoltur af dóttur sinni og hvað hún og stjúpbörn hans skipuðu stóran sess í hans lífi. Við vottum þeim og fjölskyldu samúð okkar og munum sakna góðs drengs og vinnufélaga.“