Erlendur ferðamaður lést í gær á Heilbrigðisstofnun Norðurlands á Húsavík stuttu eftir komu. Maðurinn sem leitaði þangað vegna alvarlegra veikinda, reyndist smitaður af COVID-19 kórónaveirunni, en ekki liggur fyrir hvort að andlátið tengist veirunni.
Unnið er að því að finna út dánarorsök, en sjúkdómseinkenni mannsins eru ekki dæmigerð fyrir COVID-19. Þetta kemur fram í tilkynningu frá Almannavörnum.
Aðstandendur mannsins fá áfallahjálp og stuðning, auk þess sem heilbrigðisstarfsmenn sem komu að meðferð mannsins fá stuðning. Setja þarf einhverja þeirra í sóttkví og sótthreinsa heilsugæslustöðina ásamt því að tryggja áfram nauðsynlega heilbrigðisþjónustu fyrir Húsvíkinga. Öll þessi verkefni eru unnin á vegum Almannavarnadeildar ríkislögreglustjóra, í náinni samvinnu við sóttvarnalækni, landlækni, Rauða krossinn og aðgerðastjórn almannavarna á Norðurlandi eystra og heilbrigðisstofnun Norðurlands.