Ekki er vitað til þess að Covid-19 hafi smitast með matvælum. Þeir sem eru í sóttkví og með einkenni ættu þó ekki að útbúa mat fyrir aðra. Þetta kemur fram í tilkynningu frá Matvælastofnun.
Í tilkynningunni segir að MAST hafi borist ýmsar fyrirspurnir um Covid-19 og matvæli.
Veiran sem veldur Covid-19 sé ekki matarborin, þ.e. hún fjölgi sér ekki í matvælum, en hún geti setið á yfirborði þeirra eftir úðasmit, t.d. hósta eða hnerra. Ekki sé vitað hversu lengi hún lifir á yfirborðinu en ólíklegt sé að hún nái að berast milli landa með ávöxtum og grænmeti.
Neytendur eru hins vegar, nú sem áður, hvattir til að skola ávexti og grænmeti vel fyrir neyslu.
En getur veiran borist með umbúðum matvæla?
„Það er mjög ólíklegt að menn smitist af COVID-19 við snertingu matvælaumbúða. Handþvottur eftir verslunarferð er góð venja.“
MAST bendir á upplýsingasíður Landlæknisembættisins hafi fólk aðrar spurningar.