Stærstu og fjölmennustu tónleikar Íslandssögunnar fara fram annað kvöld, þriðjudagskvöldið 24. júlí, þegar rokksveitin Guns N’ Roses tryllir lýðinn á Laugardalsvelli. Samkvæmt tilkynningu frá tónleikahöldurum má búast við um 25 þúsund manns í dalnum þetta kvöld.
Skipuleggjendur tónleikanna hvetja fólk eindregið til að fara tímanlega niður á völl til að forðast raðir. Þá hvetja þeir einnig borgarbúa til að hjóla eða ganga á tónleikana eins og hægt er, en völlurinn opnar klukkan 16.30 fyrir tónleikagesti.
Reykjavegur verður lokaður fyrir og á meðan tónleikum stendur og þá verður Engjavegur lokaður frá klukkan 16.00, nema fyrir tónleikagesti. Suðurlandsbraut verður lokuð að hluta eftir að tónleikum lýkur.
Frítt í Strætó
Tónleikahaldarar, ásamt lögreglu og Reykjavíkurborg, mælast til þess að fólk fari tímanlega af stað og nýtist eins og frekast er kostur við almenningssamgöngur, virka ferðamáta (ganga eða hjóla) eða sameinist í bíla. Besti staðurinn til þess að hleypa fólki út úr leigu- eða fólksbílum er við Glæsibæ eða á Sundlaugarvegi samkvæmt tilkynningu tónleikahaldara. Bílastæðin í kringum Laugardalshöllina eru opin, en til þess að leggja þar þurfa að vera fjórir eða fleiri miðahafar í bíl.
Boðið verður upp á sérstakar hraðferðir Strætó frá þremur stöðum í borginni og beint niður í Laugardal. Þessar hraðferðir munu fara frá Háskólanum í Reykjavik, Mjóddinni og strætóstoppistöðinni norðanmegin við Kringluna, hjá Orkunni. Sömu leiðir munu fara frá Laugardalshöll við Suðurlandsbraut og til baka eftir tónleika. Miðahafar á tónleikana fá frítt í þessar ferðir gegn framvísun miða.