Gunnar Smári Egilsson, forkólfur í Sósíalistaflokki Íslands er fastagestur á síðum fjölmiðla enda ansi skeleggur og kjarnyrtur penni. Í þetta skiptið hnýtir hann í Jón Gunnarsson, dómsmálaráðherra.
Á Facebook-síðu Sósíalistaflokksins birti hann í dag hlekk á frétt þar sem haft er eftir ráðherranum að hann muni brátt funda með lögreglumönnum og mögulega leyfa þeim að bera rafbyssur í störfum sínum.
„Í sjálfu sér er sjálfsagt fyrir ráðherra að hlusta á þessar hugmyndir og áhyggjur lögreglumanna. Það sorglega er að ráðherrar Sjálfstæðisflokksins hlusta aldrei á áhyggjur og hugmyndir hjúkrunarfólks sem er að sligast undan álagi, kvenna sem sætt hafa ofbeldi og fá ekki réttlæti eða fátæks fólks sem á ekki fyrir mat og hrekkst um á stjórnlausum leigumarkaði undan okri og braski. En þegar löggan biður um byssur; þá eru ráðherrar Sjálfstæðisflokksins ein eyru.“
Óskar nokkur skrifar athugasemd við færslu Gunnars Smára og bendir á lág laun lögreglumanna. „Þeir hlusta heldur ekki á ákall lögreglumanna sjálfra um lág laun og lélegan aðbúnað. En þegar valdið vill fá byssur, þá er lítið mál að „hlusta“ …“
Þuríður svarar Óskari og kemur með viðhorf sem oft heyrist. „Finnst þér í lagi að lögreglan sé vopna laus í þessum klikkaða veruleika sem orðinn hér? Held allan daginn að þeir sem sinni löggæslunni vilji geta varið sig og haldið lífi fyrir ástvini sína og þar skipta kannski krónur og aurar ekki máli.“
Ragnhildur svarar svo Þuríði og bendir á aðra mögulega betri lausn en rafbyssu. „Kannski best að snúa sér fremur að því að fjölga í lögreglunni og þá að fá lögreglumenn sem hafa menntað sig til starfans og hafi fengið næga þjálfun. Ef ómenntaðir og með litla þjálfun þá hafa þeir ekkert að gera með rafbyssur, væru líklegir til að skjóta fyrst og spyrja svo.“
Dóra svara síðan Ragnhildi. „Já, meiri menntun er góð hugmynd. Fjölgun, æ, ég veit ekki. En (frekari) vopnvæðing. Fáránlegt ógeð.“