Elliði Vignisson, sveitarstjóri í Ölfusi og fyrrverandi bæjarstjóri Vestmannaeyja, segir að þrátt fyrir þá þungu stöðu sem er komin upp í Eyjum vegna COVID-19 þá sé verið að vinna þrekvirki þar við að hefta útbreiðslu veirunnar. Hann kveðst hafa fullan skilning á líðan íbúa í Eyjum, ekki síst þar sem náinn ástvinur hans sé kominn í sóttkví.
„Þetta er auðvitað erfitt ástand, erfitt fyrir fólk að veikjast og erfitt að verða fyrir samkomubanni en þetta er gert af ástæðu og ég hef ekki heyrt í neinum sem setur það fyrir sig,“ segir Elliði Vignisson, sveitarstjóri í Ölfusi, í tengslum við stöðuna sem er komin upp í Vestmannaeyjum vegna kórónaveirunnar, en alls hafa 27 manns greinst með COVID-19 þar, einn hefur verið fluttur á Landspítalann og eru nær 400 manns í sóttkví.
„Vestmannaeyjar eru lítið og náið samfélag og því eðlilegt að veiran breiðist hratt út. Við sjáum þetta gerast annars staðar á landinu, til dæmis á Norð-Vesturlandi og því eru líkur á að þetta muni gerast víðar. Þetta er í takt við það sem okkar færasta fólk í þessum efnum, fólkið í framvarðalínunni í heilbrigðismálum hefur rætt þannig að þetta var viðbúið, en þetta er engu að síður þung staða,“ segir Elliði, sem ber sterkar taugar til Eyjar enda er hann fæddur og uppalinn í Eyjum og gegndi þar stöðu bæjarstjóra í tólf ár, frá árunum 2006 til 2018.
Fjölskyldan fékk óvænt símtal
Elliði segist hafa fullan skilning á því hvernig mörgum hlýtur að líða um þessar mundir, ekki síst í ljósi þess að fjölskylda hans hafi á dögunum óvænt fengið símtal frá rakningateymi Almannavarna.
„Dóttir mín fékk símtal frá teyminu í Eyjum,“ upplýsir hann. „Það kom upp smit sem er rakið til handboltaæfingu sem hún fór á 14. mars síðastliðinn þannig að hún er í sóttkví. Ég er búinn að gera fátt annað síðustu tvær vikur en að vinna í kringum þennan vírus. Það er engin stofnun hérna sem starfar eins og hún gerði. Öll orka fer í að undirbúa komu veirunnar þannig að við erum búin að undirbúa okkur vel en samt brá mér við að heyra þetta. Hún er ekki með staðfest smit, en þetta kom við mann, eins og ég held að gerist hjá okkur flestum þegar við fáum svona tíðindi. Núna vonar maður bara að þetta sé ekki smit.“
Gott starf í Eyjum gefur von
Elliði kveðst því vera vel undir það búinn að smit kunni að koma upp í fjölskyldunni og eins í sveitarfélaginu Ölfusi. „Ef það gerist vonar maður að sjálfsögðu bara að fólk nái sé hratt og örugglega,“ segir hann og bætir við að í svona aðstæðum verði fólk einfaldlega að búast við því versta og vona það besta.
„Annars vil ég taka fram að mér finnst frábært hvernig þessi mál hafa verið unnin í Eyjum. Að sjá hvernig lögreglustjóranum og hennar teymi hefur tekist að rekja svona mörg smit og hópa sem eru útsettir fyrir smitum, það gefur okkur von um að hægt sé að fletja kúrfuna og vinna málin með sama hætti. Auðvitað er erfitt að vera á undan bylgjunni, en það á það sama við í Eyjum og alls staðar, við erum með fólk sem er alltaf með bestu upplýsingarnar á hverjum tíma og það er mikilvægt að hlýða því, þannig komumst við í gegnum þetta.“
Sjá einnig: Elliði segir Sólveigu Önnu ekki lesa í aðstæður: „Sér ekki hættuna“