Niðurstöður úr neyslukönnun Gallup 2019 leiða í ljós að aldrei hafa fleiri Íslendingar verslað á netinu heldur en í fyrra. Í niðurstöðunum kemur fram að 76,8% Íslendinga hafa verslað á netinu síðustu 12 mánuði.
Niðurstöður úr neyslukönnun Gallup leiða þá í ljós að yngra fólk er líklegra til að versla á netinu en þau sem eldri eru og er hlutfallið hæst í aldurshópnum 25-34 ára, þar sem 95% höfðu verslað á netinu er fram kemur í tölum Gallup.
Töluverður meirihluti, eða 60,2% segjast versla oftar í erlendum vefverslunum en íslenskum. 22% segjast versla oftar í íslenskum vefverslunum og 17,8% segjast versla jafnoft í erlendum og innlendum vefverslunum.
Í niðurstöðum neyslukönnunar Gallup er að finna vísbendingar um hvers konar vörur fólk kaupir á netinu og hvernig vöruflokkar eru að þróast.
Árið 2007 höfðu 15,1% Íslendinga keypt föt á netinu síðastliðna 12 mánuði, en í ár er hlutfallið komið upp í 47,7%. Könnun Gallup leiddi í ljós að fólk sem á börn er líklegra til að kaupa föt á netinu en barnlaust fólk.
Karlmenn eru í miklum meirihluta þegar kemur að því að kaupa raftæki og tölvuvörur á netinu. Tæplega helmingur þeirra hafði keypt slíkar vörur á netinu síðastliðna 12 mánuði eru karlar.
Þeir vöruflokkar sem eru hvað sterkastir í netverslun hérlendis eru gisting og miðar á viðburði, en 61,5% landsmanna sögðust hafa keypt miða á viðburð í netverslun síðastliðið ár og 56,8% hafði keypt gistingu.
Vinsældir AliExpress að minnka
Niðurstöðurnar sýna þá að vinsældir kínversku netsíðunnar AliExpress eru að minnka.
Undanfarin ár hefur AliExpress átt töluverðum vinsældum að fagna á Íslandi, ekki síst eftir að fríverslunarsamningur milli Kína og Íslands tók gildi árið 2014. Það fólk sem sagðist hafa keypt vörur þaðan fór fjölgandi til ársins 2017, þegar 31,5% svarenda sögðust hafa keypt af AliExpress síðastliðið ár. Hlutfallið stóð nokkurn veginn í stað árið 2018, en í ár mældist í fyrsta skipti lækkun og sögðust 29,2% þá hafa keypt vörur síðustu 12 mánuðina.
Vinsældir fataverslunarinnar Asos hafa þá aukist svo annað dæmi sé tekið. Verslunin var fyrst mæld árið 2018 og sögðust þá 13,6% landsmanna hafa keypt vörur gegnum verslunina síðastliðið ár. Í ár hafði þetta hlutfall hækkað upp í 15,5%. Konur eru mun líklegri til að kaupa af Asos en karlar, en 21% kvenna hafði verslað á Asos á móti 10,3% karla, samkvæmt niðurstöðum Gallup. Það er áhugavert að sjá hversu vel Asos virðist ná til ungs fólks, en í aldurshópnum 18-24 ára sögðust 40,9% hafa keypt vörur af Asos síðasta árið.
Niðurstöður úr neyslukönnun Gallup 2019 má skoða nánar á vef Gallup.