Kári Stefánsson: „Mér finnst líklegt að veiran sé miklu útbreiddari“

Deila

- Auglýsing -

Forstjóri Íslenskrar erfðagreiningar telur allt eins líkur á að kórónaveiran sé mun útbreiddari en talið hefur verið og finnist í þeim sem eru með lítil eða engin einkenni.

Eins og komið hefur fram ætlar Kári Stefánsson, forstjóri Íslenskrar erfðagreiningar, að láta skima fyrir kórónuveirunni hér á landi. Spurður hvort hann telji að veiran geti hugsanlega verið útbreiddari en talið hefur verið, að fólk geti verið með mjög væg einkenni og að útbreiðslan sé því meiri, segir hann að það séu engin gögn til að styðja þá skoðun. „En mér finnst líklegt að veiran sé miklu útbreiddari og finnist í þeim sem eru með lítil eða engin einkenni,“ segir Kári og tekur fram að skimunin verði unnin undir stjórn sóttvarnarlæknis og í samvinnu við Landspítalann.

Kári tekur undir með Nicola Montano, prófessor og forstöðumaður lyflækninga við háskólasjúkrahúsið í Mílanó, sem rætt er við í helgarblaðinu Mannlíf í dag, og telur líklegt að ályktun Alþjóðaheilbrigðisstofnunarinnar, byggð á reynslunni í Kína, sé röng um að allflestir sem veikist af veirunni hafi nokkuð greinileg einkenni. „Mér finnst líklegt að þetta sé rangt en hef engin gögn enn þá til að styðja þá skoðun.“ Hann segir að ályktunin hafi líklega verið eðlileg fyrir nokkrum vikum en svo sé ekki í dag.

Talið er að veiran hafi stökkbreyst en Kári segir að það þýði að auðveldara verði að rekja en ella smit ef veiran hafi stökkbreyst. „Á hinn bóginn getur þá verið erfiðara að þróa bóluefni og eins hitt að veiran gæti fundið sér leiðir fram hjá ónæmiskerfi einstaklinga,“ segir Kári.

Ítarlegri umfjöllun er um málið í helgarblaðinu Mannlíf.

- Advertisement -

Athugasemdir