Rekstri og starfsemi Samherja hefur verið umturnað vegna útbreiðslu COVID-19 og þeirra aðgerða sem yfirvöld hafa gripið til í von um að hefta útbreiðsluna. Þetta er á meðal þess sem kemur fram í bréfi sem Kristján Vilhelmsson, útgerðarstjóri Samherja, sendi til sjómanna á skipum í útgerðarflota Samherja á dögunum. Bréfið er birt á vef Samherja.
Kristján skrifar um þær aðgerðir sem hefur verið gripið til í fiskvinnslunni og leggur svo til að sjómenn á skipum Samherja einangri sig eins lengi og hægt er og auki þannig líkur á að hægt sé að halda skipunum lengur í notkun.
„Skip er vinnustaður með mikla nánd manna, þess vegna þarf að hugsa þar ráð sem best geta dugað. Í sjálfu sér er ekki smithætta úti á sjó svo fremi sem enginn er smitaður. Meðal annars þess vegna, og vegna þess sem á undan er sagt kom sú hugmynd að áhöfn hvers skips væri í raun í einskonar einangrun um borð eins lengi og fært er og þannig minnka líkur á smiti. Hversu langur sá tími verður er alveg undir áhöfn komið, þetta er ný hugmynd sem kom upp sem tilraun í baráttunni og virðist í raun vera nokkuð skynsöm. Okkur er ljóst að þetta er ekki auðvelt fyrir marga og kannski sérstaklega vegna þess að það er ekki hefð fyrir að taka marga túra í röð án þess að fara í land á milli. Með þessu teljum við auknar líkur á að takist að halda skipunum lengur inni í rekstrinum og þar með tekjum ykkar,“ skrifar Kristján.
„Okkur er ljóst að þetta er ekki auðvelt fyrir marga og kannski sérstaklega vegna þess að það er ekki hefð fyrir að taka marga túra í röð án þess að fara í land á milli.“
Hann segir markaðina hafa snarbreyst á undanförnum tveimur vikum og erfitt sé að spá um framhaldið.
„Markmið fyrirtækisins er að gera það sem hægt er til að halda starfsfólki frá smiti en á sama tíma að fólkið haldi vinnu. Það er einungis hægt með samstilltu framtaki hvers og eins. Þannig trúum við að best verði að koma aftur í venjulegan rekstur þegar fárinu lýkur og að enginn viðskiptavinur erlendis hafi gleymt okkur,“ skrifar Kristján í bréf sitt sem hægt er að lesa í heild sinni hérna.