Margir Grindvíkingar eru óánægðir með þá ofstjórn sem þeir sæta af hálfu Almannavarna varðandi aðgengi að bænum sínum. Stefán Kristjánsson, eigandi fiskvinnslunnar Einhamars, gagnrýndi Almannavarnir fyrir að banna íbúum og starfsfólki bæjarins að vitja eigna sinna í góðviðri sunnudagsins. Hann birti færslu á Facebook á laugardag þar sem hann gagnrýndi ákvörðun Almannavarna.
„Við Grindvíkingar höfum alist upp við allskyns veður og þetta veður í dag var ekki slæmt og svo er blíða á morgun sunnudag, ekki fæst leyfi til heimferðar enn og aftur og nú er veðrið notað sem ástæða,“ skrifar hann.
Stefán er harðorður vegna stöðunnar og telur að meðalið sem Víðir Reynisson og félagar noti til að bjarga fólkinu frá náttúruhamförunum sé svo sterkt að „sjúklingurinn deyr.“
„Grindavík er að kafna, Grindavík er að deyja en áfram skal Grindavík haldið í herkví og það af engum ástæðum. Sprungusvæðin hafa verið girt af, allar götur hafa verið keyrðar ótal sinnum af viðbragðsaðilum og farið hefur verið í öll hús mörgum sinnum af pípurum og björgunarsveitum, Grindavík er eins örugg og hún getur verið,“ sagði hann og lýsir því að fjöldi fyrirtækja sé orðinn gjaldþrota vegna aðgerðarleysis og tugir og hundruð milljóna hefðu farið forgörðum vegna ónýtra birgða og afurða sem hefði verið hægt að bjarga.
„Víðir, Úlfar og Sigríður Björk, skammist ykkar fyrir fantaskapinn,“ skrifar Stefán og margir taka undir með honum …