„Það er okkar tilfinning. Að ofbeldisbrotum sé að fjölga og harkan sé að aukast.“ Þetta segir Helga Rósa Másdóttir, hjúkrunardeildarstjóri bráðamóttöku, í samtali við Fréttablaðið í dag þar sem staðan á bráðamóttöku Landspítalans í Fossvogi er til umræðu. Á meðal þess sem fram kemur er að starfsfólk bráðamóttöku taki eftir því að aukin harka sé að færast í undirheimana.
Samkvæmt fréttinni hefur heimsóknum á bráðamótttökuna fækkað mikið undanfarnar
vikur en fjöldi innlagna hefur haldist í stað. Segir Helga Rósa sjúklinga leita í auknum mæli fyrst til heilsugæslunnar. Svo virðist sem tilmæli sóttvarnalæknis um samkomubann og samskiptafjarlægð hafi einnig áhrif. Færri slys verði þar sem fólk er minna á ferli og tilfellum smitsjúkdóma, eins og innnflúensu og nóróveiru, hafi af þeim sökum sömuleiðis fækkað.