Matreiðslubókin Grænkerakrásir Guðrúnar Sóleyjar: vegan uppskriftir fyrir mannúðleg matargöt eftir sælkerann og fjölmiðlakonuna Guðrúnu Sóleyju Gestsdóttur hlaut á dögunum hin eftirsóttu alþjóðlegu Gourmand-matreiðslubókaverðlaun í tveimur flokkum. Annars vegar í flokki veganbóka þar sem hún hreppti fyrsta sætið og hins vegar í flokki skandínavískra bóka þar sem hún hafnaði í þriðja sæti.
Bækur frá fleiri en 200 löndum og landsvæðum keppast um verðlaunin árlega og samkeppnin er hörð. Gourmand-verðlaunin hafa verið veitt frá árinu 1995.
Grænkerakrásir komu út fyrir jólin 2018 og bókin hefur fengið mikið lof.
Guðrún Sóley sagði í samtali við Mannlíf þegar bókin kom fyrst úr að uppskriftirnar í bókinni væru fyrir alla sælkera, ekki bara þá sem eru vegan.
„Ég lagði þunga áherslu á að hver einasti réttur væri bragðgóður, djúsí og mettandi. Vegan matur er alls ekkert megrunarfæði eða eintómt hrátt brokkolí. Hún er líka fyrir þá sem vilja auka hlutfall grænmetis í mataræðinu sínu og læra að fara með hráefni sem okkur er kannski ekki tamt að nota,“ sagði Guðrún í samtali við Mannlíf 2018.
Afhending Gourmand-verðlaunanna átti að fara fram í París í júní en vegna aðstæðna varð ekkert af þeirri verðlaunaafhendingu og var því slegið í óformlega verðlaunaafhendingu á Vinnustofu Kjarvals á 17. júní er fram kemur í tilkynningu um Gourmand-verðlaunin sem bók Guðrúnar hlaut.
Myndirnar í bókinni tók Rut Sigurðardóttir og Þorbjörg Helga Ólafsdóttir sá um hönnunina.
Sjá einnig: Gæti borðað avókadófranskarnar með chili-majó í öll mál