Kafbátur á vegum ferðaþjónustufyrirtækisins OceanGate sem notaður er til bjóða viðskiptavinum skoðunar- og könnunarferðir að frægasta skipsbraki veraldar, Titanic, er nú týndur á hafi úti en ekki er vitað nákvæmlega hvenær samskipti við farið rofnuðu.
Búið er að ræsa út viðbragðsaðila eftir að ljóst varð að samskipti við farið hefðu rofnað á sunnudagskvöld en gert er ráð fyrir að farið sé um 700 kílómetra suður af Nýfundnalandi.
Farið sem um ræðir er um sjö metrar á lengd, tíu tonn að þyngd, getur flutt fimm sálir niður á 4000 metra dýpi og hefur súrefnisbirgðir í 96 klukkustundir. Farmiðinn kostar ríflega 34 milljónir íslenskra króna en auk þriggja farþega eru tveir í áhöfn.
Einn farþeganna, breski könnuðurinn og auðkýfingurinn Hamish Harding, lýsti því yfir á samfélagsmiðlum fyrir brottför að veðrið hefði boðið upp á glugga fyrir áhöfnina að ýta úr vör en þar sem veðurskilyrði liðinn vetur hefðu verið þau verstu í 40 ár væri ósennilegt að fleiri ferðir yrðu farnar að Titanic þetta árið.
Í yfirlýsingu sinni segja OceanGate að þau einblíni fyrst og fremst á áhafnarmeðlimi og fjölskyldur þeirra.