Ástralskur unglingur var hætt kominn eftir að hann var bitinn af eitruðum kolkrabba á dögunum. Kolkrabbinn, sem var af tegundinni Blue-ringed octopus, hafði falið sig innan í skel í sjónum. Pilturinn, Jacob Eggington(18), kom auga á skelina sem hann tók upp úr sjónum til þess að sýna frænku sinni. Kolkrabbi af þessari tegund gefur frá sér banvænt eitur þegar hann bítur sem var einmitt það sem gerðist næst.
Jacob tók ekki strax eftir því að hann hafði verið bitinn og kallaði til bróður síns að hann hafi snert kolkrabbann sem var í þessu tilfelli á stærð við lófa og heldur sakleysislegur ásjónu. Bróðir hans flýtti sér til hans og skoðaði hann. Jacob hafði verið bitinn í fótinn og varð það honum til lífs að hann leitaði rakleitt til læknis. Kolkrabbar af þessari tegund eru algengir við ströndina en bitin geta dregið fólk til dauða á innan við þrjátíu mínútum komist það ekki strax undir læknishendur.