Lögreglu barst tilkynning um líkamsárás í gærkvöldi þar sem þrír menn voru sagðir hafa ráðist á einn. Samkvæmt dagbók lögreglu áttu slagsmálin sér stað fyrir utan fjölbýlishús en enginn slasaðist alvarlega og ekki var þörf á sjúkrabifreið. Fyrr um kvöldið sinnti lögregla útkalli vegna þjófnaðar í verslun. Þjófurinn náðist á myndskeið í eftirlitsmyndavélakerfi og sást til viðkomandi hafa á brott með sér fatnað.
Þá barst lögreglu tilkynning um mann í annarlegu ástandi í lyfjaverslun og síðar um kvöldið var henni gert viðvart um stolna bifreið. Sem betur fer fannst bifreiðin skömmu síðar. Nokkrir voru stöðvaðir vegna gruns um akstur undir áhrifum vímuefna. Einn þeirra gerði tilraun til þess að gefa upp ranga kennitölu en náði hann ekki að blekkja laganna verði.